الأوضة الضلمة جوانا
قلم إيمان سعد
جوانا حاجات ما نقدرش نقرب منها
مش لأننا ضعاف
لكن لأن الوجع اللي فيها أكبر من شجاعتنا أحيانا
جوانا صناديق مقفولة كل صندوق فيه حكاية اتكسرت فى نصها وكل واحد فينا جواه أوضة ضلمة…
هو نفسه بيخاف يدخلها
قلت لنفسي:
ليه كل ما أقرب للباب قلبى يدق كده؟
ردت على
عشان ورا الباب في وجع قديم
وانت لسه ما سامحتى نفسك عليه
قلت:
طب أسيبه مقفول وخلاص
قالت:
ولو سبتيه هيفضل يوجعك من غير ما تحسى
الوجع اللى ما يتحكيش بيكبر
قلت:
طيب ولو دخلت؟
قالت:
هتتوجع شوية
بس هتطلع أخف
مش كل حاجة نسيان
فى حاجات محتاجة مواجهة
سكت لحظة
قلت:
أنا خايفه
قالت:
الخوف طبيعى بس الهروب مش أمان
قربت من الباب في خيالى
مديت إيدى بس رجعتها
قلت:
مش دلوقتي
ابتسمت نفسى وقالت:
على مهلك…
الشجاعة مش خطوة واحدة الشجاعة إنك تعترف إن فيه باب
وإنك ناوى تفتحه يوم ما تبقى جاهز
ومن ساعتها فهمت:
مش عيب يكون جوانا أوض ضلمة
العيب إننا نفضل عايشين عمرنا كله من غير ما نحاول نولع فيها نور
بقلم إيمان سعد عبدالحليم
