انتو ياللي بتسألوني
كتابة/ رضا خضر
انت مين وِسط الألوووووف
سؤال تَمَلّى بتسألوه
وجوابه في شوية حروووف
أنا العزيمة والإرادة
بركان بِيِغْلٍى يفُور ريادة
وحياتنا عايشينها بسعادة
من غير خَجَل وبدون كسووف
لو الملامح تترسَم
ولا الحقيقة تتقسَم
أنا المعاق ذوي الهمَم
وكفانا رَكْنَه ع الرفووووف
قولتو دُول أصحاب عاهات
صَنعنا والله المعجزات
وخُطانا سابقه وبثبات
ولا هَمّنا عُذر وظروووووف
أنا زَيّي زَيّك وإعتَرَف
ويمكن أقوى ولِى الشرَف
حياتنا مخلُوقَه لهدَف
ولا جِه في بالنا مَرّه خووووف
ولو طريقنا كان طويل
حالفِين ما نعرف مستحيل
وقلوبنا في الضّلْمَه دَلِيل
بإرادة راسماها العقوووول
القلب أهو راضي بنصِيبُه
والحق مش ممكن نسِيبُه
حالفِين بعَدْل الله نجِيبُه
ولو حارِبنا ألف غوووول
بالعزيمة خَلَقنا حاله
ونجحنا والله ببساله
ولا يوم هنرضَي نبقى عَالَه
نظرِتكُو دي لازم تزوووول
