بقلم: سيد جلال الفرماوى
النجاح مش لحظة
ولا تصفيق
ولا صورة مبتسمة
النجاح حكاية طويلة مليانة وجع
واللي بيشوف النهاية بس عمره ما هيحس بالحقيقة
محدش بيحب يسمع عن السنين اللي راحت
عن التعب اللي ما كانش باين
عن الخوف اللي كان ساكن جوه القلب
الناس بتعشق النجاح لما يبقى سهل
لكن اول ما يظهر تمنه الحقيقي
كل واحد يبعد خطوة
الوجه الاخر للنجاح هو الوحدة
انك تلاقي نفسك ماشي لوحدك
مش لانك احسن
ولا لانك اكبر
لكن لان الطريق ضيق
وما يستحملش زحمة
ناس كتير تبدأ
وقليل يكمل
واقلهم اللي يقدر يستحمل
النجاح كمان بيكشف
بيكشف اللي كان جنبك بجد
واللي كان مستنيك تقع
بيكشف النوايا
وبيعرّي القلوب
وفي اللحظة دي بتفهم
ان الخسارة مش انك تخسر ناس
الخسارة انك تفضل مش فاهمهم
من تمن النجاح انك تدفع من نفسك
من صحتك
من هدوءك
من نومك
من راحتك
وفي لحظات كتير تدفع من قلبك
وتكمّل وانت موجوع
لان الرجوع بقى مستحيل
النجاح ما بيديش اجازه
ما بيسمحش بالضعف
اول ما تنجح
تبقى مطالب دايما
تبقى تحت العين
تحت الحكم
اي غلطة تتفسر
واي هدوء يتحسب تراجع
اللي كانوا بيعدوا غلطك زمان
دلوقتي يستنوها
اللي كانوا ساكتين
بقوا ناقدين
واللي كانوا مش شايفينك
بقوا مراقبينك
وده جزء من الثمن
سواء قبلته او لا
وفيه ثمن اخطر
الخوف
الخوف من انك تخسر اللي بنيته
الخوف من انك تقع بعد ما عليت
الخوف من ان اللحظة الجاية ما تبقاش بنفس اللمعة
النجاح ساعات يتحول لحراسة مستمرة
تحرس مكانك
وتحرس اسمك
وتحرس صورتك
ناس كتير نجحت
بس ما ارتاحتش
لانها كانت فاكرة ان النجاح نهاية
وهو في الحقيقة بداية اصعب
بداية مسئولية
وبداية اختبار اطول
ومع كل ده
النجاح يستاهل
يستاهل لانك لما تبص وراك
تلاقي انك ما هربتش
ولا استسلمت
ولا بعت نفسك
تلاقي انك اخترت الطريق الصعب
ودفعت التمن كامل
النجاح مش ضربة حظ
ولا مجاملة
ولا هدية
النجاح اختيار
اختيار انك تكمل وانت تعبان
وانك تصدق نفسك وقت ما الكل يشكك
وانك تدفع وانت عارف ان الفاتورة عالية
الوجه الاخر للنجاح مش اسود
لكنه حقيقي
واللي مش مستعد يشوفه
يبقى مش مستعد للنجاح نفسه
فاللي ناوي ينجح
لازم يبقى فاهم
ان الطريق مش مفروش
وان التمن غالي
بس اللي بيوصل
بيفهم
ان مفيش حاجة حقيقية
تيجي من غير وجع
